Lina Riccobene, POESIE



LI “SENZA TERRA” E “SENZA NOMU”

Ci ni su’ cani
ca puonnu azzannari li ma carni
ppi poi abbaiari ‘n capu l’avanzi di lu ma cori
arridduttu pizzuddra pizzuddra?

E dopu ‘stu spettaculu
ni cadissiru màscari di la facci di chiddri
ca si ci ammuccianu la cuntintizza?

Si n’hann’ a putìri cogliri cchiù o abbrusciari
spichi di giugnu
ccu ‘stu suli can un garantisci chiù stasciuni?

Siddru un juornu mi putissi arrinesciri
di vutàrimi a l’annarrieri...
l’è putiri vìdiri ‘na stiddra ca s’ammisca ccu lu cielu
o lu stierru ca s’ammisca ccu ‘na muntagna di petri?

Propriu ‘ssa stiddra vulissi affirrari.

E siddru la putissi aviri ni li manu
nun dicissi “fermati tiempu!” ma
la dassi a la vita
pirchì putissi – almenu ‘na vota –
sbilunniàri ni lu cielu
di chiddri senza terra e senza nomu,
senza presenti e senza futuru
       e ca ‘n capu li spaddri
portanu sulu ‘na truscia

       d’un passatu di guai e di carni strazzati.

*(Primo premio regionale per la poesia dialettale "Giuseppe Serroy, 2017)  

Nessun commento:

Posta un commento